Co quai che las Ovras Electricas da l’Engiadina han communitgà è la dumonda da construcziun per l’implant fotovoltaic en la regiun da Motta Naluns vegnida inoltrada uffizialmain. L’implant duess producir forza electrica per fin 12’000 chasadas a partir dal 2025.
Project è vegnì reducì
Oriund era l’implant fotovoltaic a l’ur dal territori da skis Motta Naluns planisà pli grond. Il project è vegnì reducì d’ina surfatscha da var 77 hectaras ed ina producziun da 60 uras gigawatt l’onn sin ina surfatscha da 57 hectaras cun ina producziun da 48 uras gigawatt l’onn. La Confederaziun surpiglia en il rom da l'uschenumnà Solarexpress 60% dals custs. Davart la participaziun finanziala da la vischnanca, duai la populaziun da Scuol lura ir anc ina giada a l'urna.
Scuol Solar e la sfida cun il squitsch da temp
Suenter il Gea dal suveran da Scuol stoi uss ir svelt. Be sche l'implant è la fin da l’onn 2025 en funcziun e furnescha 10% da l’energia premissa, surpiglia la Confederaziun fin 60% dals custs. Tut quai è ina gronda sfida.
Il suveran da Scuol ha dà stgars il consentiment per l'implant solar
Suenter la vischnanca burgaisa ha er la vischnanca politica dà il consentiment. A Sur Bos-cha duai vegnir construì in implant fotovoltaic. Cun ina cumpart da 52% Gea ha il suveran da Scuol dà stgars il consentiment per il project sco tal ed er dà liber il terren. Per las persunas responsablas vul quai pia dir ch’ellas pon cuntinuar cun l’elavuraziun dal project concret e preparar la dumonda da construcziun. A la votaziun han 42% da las persunas cun dretg da votar fatg part.
Surlevtg tar ils aderents, nagina dischillusiun tar ils adversaris
La presidenta communala Aita Zanetti è cuntenta cun il resultat. Ella saja grata e levgiada che la populaziun da Scuol haja dà la pussaivladad da cuntinuar cun la lavur. I saja cler ch'els hajan da prender serius las temas e las criticas ch'èn vegnidas expressas l'ultim temp. La finamira saja d'avair in project che vegn sustegnì da la populaziun.
Not Carl ha crititgà avant la votaziun tranter auter la grondezza dal project. Sco ch'el ha declerà envers RTR, na saja el betg dischillus dal resultat. Che passa 600 persunas hajan ditg Na saja in surpraisa, tar las radunanzas communalas era il resultat pli cler. Not Carl spera ch'ils responsabels respectian er l'opiniun da quels e quellas ch'han votà Na.
