Dapi radund in mez onn producescha l'ovra solara da Sedrun Solar energia regenerabla. L'emprim enviern han ins producì energia cun radund 6'000 moduls solars. Quai è radund in tschintgavel da l'entira ovra – che duai esser bajegiada a fin en trais onns.
-
Bild 1 von 2. Mintgamai sis moduls solars èn plazzads ensemen sin ina «maisa» – e drizzads en direcziun dal sulegl. Bildquelle: RTR.
-
Bild 2 von 2. Ils moduls solars na tschiffan betg mo ils radis directamain dal sulegl, mabain era la reflexiun da quels entras la naiv. Bildquelle: RTR.
Il manader da l'Energia Alpina, Ciril Deplazes, è cuntent cun l'emprim enviern. I n'haja dà nagins incaps pli gronds. Sulet dus transfurmaturs hajan ins stuì midar ora perquai ch'els hajan gì in defect. Quai haja dentant mo gì curt in effect negativ sin la producziun – quella saja stada en il rom calculà.
Cun la «producziun» è manegià quant energia ch'ils moduls solars èn buns da furnir. Per cuntanscher il maximum èsi impurtant che tut ils moduls vegnan montads cun l'angul optimal cun il sulegl. Las singulas maisas cun ils moduls solars èn vegnidas montadas cun agid d'ina maschina ch'è vegnida sviluppada per quest intent.
Meglra che calculada è la prestaziun maximala dals singuls moduls. Sco ils responsabels din, hajan ins quintà cun 580 watts prestaziun maximala – quella saja dentant stada tar fin a 700 watts.
La differenza tranter la calculaziun e la prestaziun reala declera Ciril Deplazes cun il fatg ch'els hajan calculà precaut – en general stoppian els rimnar experientschas, cunquai ch'els han ina da las emprimas ovras solaras alpinas che produceschan energia. Mo Madrisa Solar, sur Claustra, è stada a la rait avant Sedrun Solar.
-
Bild 1 von 2. Martin Cavegn, manader da la partiziun energias regenerablas, Energia Alpina. Bildquelle: rtr.
-
Bild 2 von 2. Ciril Deplazes, mainafatschenta da Energia Alpina. Bildquelle: rtr.
Era l'aura da quest enviern saja stada optimala per els, cun pauca naiv e bler sulegl. Martin Cavegn, il manader da la partiziun energias regenerablas, avess dentant giavischà dapli naiv, per anc pudair rimnar dapli experientschas cun l'aura d'enviern.
Era Madrisa Solar surpassa las spetgas da producziun
Era l'ovra electrica alpina Madrisa Solar ha producì dapli energia durant l'emprim enviern che prognostitgà. Da l'october fin il mars han ils emprims moduls solars da l'ovra ch'èn vegnids montads producì 1,5 uras gigawatt electricitad. I saja sa mussà che la prestaziun dals moduls saja creschida per 15% suenter l'emprima naiv, quai communitgescha la Repower.
Fin ussa èn 20% da l'entir implant en funcziun. L'entschatta matg cumenza lura la segunda etappa e fin la fin da november duain 70% da l'implant vegnir colliads cun la rait. La fin dal 2027 èsi lura planisà che l'entira ovra è en funcziun. Ella duai furnir electricitad per 3'800 chasadas. In onn pli tard, la fin dal 2028, duain ils implants Sedrun Solar e Nalpsolar vegnir finalisads e furnir electricitad per 6'500, respectiv 2'000 chasadas.
Emprima bilantscha per Nalpsolar
Ina bilantscha pli precauta fa l'Axpo per Nalpsolar, nua ch'ins ha producì 0,43 uras gigawatt, vul dir energia per radund 80 chasadas. Causa l'avertura successiva dals implants ed ina furniziun en la rait anc provisorica na sa lascha betg anc propi far ina bilantscha. Fin uss saja be anc 10% da l'entir parc vid la rait. L'entir implant Nalpsolar duai esser a fin en dus onns.