Avant bun quatter mais han las lavurs da construir l'ovra da fotovoltaica Sedrun Solar cumenzà. En il territori dal Cuolm Val e Scharinas sur Selva e Tschamut vegn construì in implant da fotovoltaica per 87 milliuns francs che furnescha en l'avegnir energia per 6'500 chasadas. Suenter la finiziun da las lavurs da construcziun vegn ella a producir radund 29 gigawatt-uras, da quai 47% il mez onn d'enviern.
Sco che Sedrun Solar scriva en ina communicaziun als meds da massa èn 15% da l'ovra construida, vul dir 850 da totalmain 5'700 maisas cun panels da fotovoltaica. Las lavurs èn s'avanzadas uschia che l'emprima energia po vegnir furnida en la rait. Solar Sedrun è ina societad d'aczias che appartegna mintgamai per la mesadad a l'Energia alpina ed Aventron. L'ovra sa chatta sin in'autezza da 1'950 enfin 2'145 m s.m.
Emprima kilowatt-ura
«Igl è uschè lunsch: Sedrun Solar – la pli gronda ovra da fotovoltaica alpina da la Svizra – furnescha l'emprima kilowatt-ura current en la rait», scriva Sedrun Solar en ina communicaziun als meds da massa. En il rom d'in act festiv vegn quest term simbolic commemorà mesemna, ils 22 d'october 2025 en il territori da l'ovra a Cuolm Val e Scharinas.
Cun quai cuntanschin nus in impurtant term tecnic e dain in ferm accent a la midada da la producziun d'energia en Svizra.
Ch'igl è reussì da cuntanscher la finamira da furnir emprima energia electrica en la rait quest atun attribuescha l'interpresa a differents facturs: «Pussaivel è quai grazia a la collavuraziun optimala cun las interpresas da construcziun, las autoritads chantunalas e communalas sco era la populaziun da Tujetsch.»
Cun pendiculara e helicopter
Avant bun in onn han las preparativas per il plazzal a Cuolm Val–Scharinas cumenzà. Enfin che las lavurs da construcziun da las maisas cun panels da fotovoltaica han cumenzà questa primavaira, hai gì num construir l'access ed ina pendiculara da transport. Cun quella pendiculara da Prau Mulin sut Tschamut enfin sin il Cuolm da Val vegn tut il material transportà sin il plazzal, tranter auter las maisas cun fotovoltaica en la dimensiun da mintgamai 2,4 sin 7,5 meters. Davent dal plaz d'installaziun sin il Cuolm Val vegnan ils elements d'atschal e da fotovoltaica lura repartids sin il plazzal cun agid da helicopter. Uschia stattan las immissiuns da canera en la val en in rom acceptabel. Tut en tut vegnan radund 12'000 tonnas atschal manadas cun la pendiculara en il territori da l'ovra. La pendiculara è 2,4 km lunga. La partenza simbolica per las lavurs da construcziun da quest project è succedida mez zercladur cun ina festa a Sedrun.