La pitschna interpresa d’electricitad Energia Alpina ch’è dal tut en possess da la vischnanca da Tujetsch – è l’emprima interpresa ch’ha propi inoltrà ina dumonda da construcziun per ina ovra solara alpina. Il temp per far recurs cunter questa dumonda è scadì senza che quai ha dà in recurs, ma era senza ch’insumma insatgi ha prendì invista en ils documents. Quai declera il mainafatschenta da l’Energia Alpina Ciril Deplazes. Ma cun la dumonda da construcziun na vegnian las sfidas betg pli pitschnas, ha Deplazes agiuntà.
Pliras chaussas van parallel
Forsa la gronda sfida saja che bleras chaussas van parallel. Uschia saja uss per exempel da sclerir la dumonda da segiradas ed il medem mument saja da sclerir dumondas sco per exempel tgi cumpra l’electricitad che vegn ina giada producida, tut chaussas che sajan parallelamain da sclerir. Cler ina sfida ma er ina bella sfida, declera Ciril Deplazes. Ch’els sajan uss ils emprims na fetschia betg pli simpel la chaussa – pertge ils uffizis tant chantunals sco federals n’hajan fin uss era betg sclerì tut las dumondas e quai dettia ulteriurs obstachels. Ma pli gugent esser ils pioniers ch'ils ultims en il circus.
Lubientscha duai esser sin maisa la primavaira 2024
La finamira saja uss d’entrar en la proxima fasa da test, cun las maisas nua ch’ils panels solars vegnan montads. Quels elements sajan il grond factur da custs e perquai saja impurtant da chattar qua ina optimala soluziun, declera Ciril Deplazes. Il mument vegnia quintà tut cun cifras da calculaziun, in'offerta concreta quant che tut il material pudess custar n’haja anc nagin en Svizra sin maisa. Era hajan els uss gia scrit ora las lavurs cun las resalvas necessarias.
Il mument saja da quintar cun ina lubientscha da construcziun dal chantun la fin d’avrigl, e cun las confermas dals uffizis federalas probabel quatter emnas pli tard. Per esser a fin cun ina part sin la fin dal 2025, stoppian las lavurs cumenzar la proxima stad. Sche na, vegnia tut stretg cun il temp. Ma els sajan fitg optimistics ed il mument ils prims, declera Ciril Deplazes.
