La pitschna vischnanca da Tujetsch fa, sco pionier, actualmain avanzar la revoluziun solara en las apls svizras. Al pe dal Alpsu construescha l'Engergia Alpina – ina pitschna interpresa d'energia da la vischnanca da Tujetsch – l'emprim grond indirz solar alpin da la Svizra. Var 1'000 panels solars duain vegnir installads a Tschamut fin l'enviern. Igl è in project ambiziunà, per quel che la vischnanca da Tujetsch investescha ils proxims quatter onns radund 85 milliuns francs.
Nus avain las dretgas persunas, ch'èn motivadas da realisar quest project.
Malgrà la dimensiun dal project haja l'Energia alpina mess gronda paisa sin la protecziun da l'ambient durant la planisaziun. Il project pudessia schizunt avair avantatgs nunspitgads per la fauna dal conturn. Ervin Monn, expert da l'ambient per il project, declara: «L'installaziun dals panels solars pudess stgaffir nov spazi da viver per intgins utschels e uschia augmentar la biodiversitad en la regiun.»
Lavurs cumenzan cun partenari Aventron
Suenter che las lubientschas da construcziun èn idas en vigur senza recurs, ha l'Energia Alpina chattà cun la firma Aventron il partenari strategic ch'i dovra per realisar l'ovra gronda da bun 80 milliuns francs a Scharinas en la val Tujetsch. Aventron è ina firma svizra che posseda e gestiunescha en l'entira Europa var 300 ovras d'energia regenerabla.
Ussa vegnia fundà ina societad acziunaria communabla per realisar e gestiunar l'ovra solara. La maioritad – e cunquai la decisiun da tagl – salva però l'Energia alpina.
Pertge in partenari strategic?
I dovria in ferm partenari strategic, perquai ch’ils custs da 80 fin 85 milliuns francs na possia l’Energia Alpina betg purtar persula. Era portia in partenari strategic savida ed experientscha tar in tal project, uschia han ils responsabels infurmà las convischinas ed ils convischins da Tujetsch. Er impurtant saja da vegnir da vender l’energia ed era qua possia in ferm partenari purtar avantatgs, uschia Claudio Deplazes, president dal cussegl d’administraziun a l’ultima radunanza da vischnanca.
En la collavuraziun cun Aventron possian ins cumbinar l'experientscha da la Energia alpina en connex cun tecnologias d'energia alpinas e l'experientscha dad Aventron en la sparta d'energias regenerablas. Uschia vegn Claudio Deplazes cità en la pli nova communicaziun.
Era gia punctuà en l'ultima infurmaziun als convischins, avevan ils responsabels ch'il project vegnia surlavurà successivamain, surtut ils elements da montascha vegnian sviluppads vinavant, perquai che las maisas da montascha sco era l’entir encablament fetschian ora circa 80% dals custs.
Las lavurs da construcziun cumenzan mez avust. Ils emprims 10% da l’ovra han da vegnir vi da la rait fin l'onn 2025, l’entira ovra è planisada d’esser a fin sin l’atun 2028.
Lubientscha da bajegiar senza recurs
L’ovra solara Scharinas ha survegnì la fin da matg la lubientscha da construcziun dal chantun sco era la lubientscha per las lingias electricas da colliaziun e las staziuns da transfurmaziun necessarias. Quai saja l’emprima lubientscha cumpletta per ina ovra solara gronda, scriva l’Energia Alpina en la communicaziun a las medias. Questa lubientscha è entant ida en vigur senza ch'igl ha dà recurs entaifer ils 30 dis suenter la publicaziun la fin matg.
Nagins recurs l'onn passà
Il temp per far recurs cunter il project a Scharinas era scadì senza in tal. Ma era senza ch’insumma insatgi aveva prendì invista en ils documents.
