La regenza ha approvà in project da la vischnanca da Scuol per construir rempars per lung dal torrent «Val Triazza» a Pradella. Chantun e Confederaziun sa participeschan a quel cun maximalmain 1,81 milliuns francs en il rom da la cunvegna da program da la NGF «Ovras da protecziun cunter l'aua». Ils custs totals dal project muntan a 3,3 milliuns francs.
Donns totals suenter aua gronda
Il project duai reducir il privel d'aua gronda ad ina dimensiun acceptabla. La stad 2015 han ferms urizis chaschunà aua gronda da l'aual «Val Triazza». Silsuenter ha quel inundà il territori d'abitadi da Pradella. Ina chasa d'abitar e duas chasas da champs han subì donns totals.
In mir per proteger il vitg
Il nov project cumpiglia mesiras da la construcziun idraulica en differents lieus per lung da tut l'aual en il territori dal vitg. L'element central dals rempars furma in mir da protecziun cunter aua gronda d'ina autezza da var 1,5 meters per lung da la riva dretga. Quest mir duai impedir ch'il vitg da Pradella vegnia inundà en l'avegnir.
