Tenor l'administraziun communala na sajan vegnids inoltrads nagins recurs cunter il project «Scuol Solar». La dumonda da fabrica è inoltrada tar il chantun, durant quella procedura han ils differents uffizis ed era las instituziuns per l'ambient anc la pussaivladad da prender posiziun. Cun la resposta definitiva spetg'ins il cumenzament da l'onn 2024.
La dumonda da fabrica è inoltrada cun ina surfatscha reducida
Durant ils mais d’atun han ins finalisà ils rapports da la geologia, il privel da la natira ed era il rapport ecologic. Il resultat da quests rapports ha manà a la conclusiun da redimensiunar il project actual. Il project prevesa anc ina dimensiun da 57 hectaras, avant eri planisà 77 hectaras. La reducziun saja oravant tut en la planira, nua che l'effizienza dals panels na fiss betg stada uschè buna. Perquai na sa reduceschia la prestaziun betg uschè fitg sco la surfatscha, ha ditg il mainaproject Chasper Alexander Felix.
1'500 panels damain
Il project surlavurà ed inoltrà a la vischnanca da Scuol prevesa ussa 10’000 panels solars, nov prevesan ins da producir radund 48 uras gigawatt u forza per radund 12’000 chasadas. Questa optimaziun dal project ensemen cun las calculaziuns finanzialas mainan ad ina valitaziun da la rentabilitad e quella valitaziun saja finalmain la basa per decider durant ils mais da primavaira 2024 sche Scuolsolar vegn insumma fabritgà u betg.
Avant ch'inoltrar la dumonda da fabrica han ins era gì contact cun differentas instituziuns per l'ambient. Tenor il mainaproject Chasper Alexander Felix han quels tut cogniziun dal project.
