Siglir tar il cuntegn

Segl 50 onns chasa da scola Champsegl

Bun 120 persunas, famiglias, indigens ed anteriuras scolaras e scolars èn seguids a l’invit da la vischnanca per festivar il giubileum da 50 onns da la scola Champsegl. Avant in mez tschientaner han ils scolars e las scolaras midà da las stanzas en chasa communala Segl en quellas dal nov bajetg a l’ur da la vischnanca. Quai or da motivs da plazza.

Attracziuns per pitschens e grondas

Per festivar l’anniversari da la chasa da scola han ils organisaturs preparà in vast program, surtut cun attracziuns per ils bun 50 uffants che van a scola a Segl. Cumenzà cun percurs, sur in post da smincar fin tar ina disco la saira per ils uffants pli vegls. Ina discussiun da podium ha tractà la dumonda co ch’ina chasa da scola ha d'esser ozendi.

La chasa sumeglia ina stalla

L’edifizi da la chasa da scola Champsegl è vegnì construì il 1973. Entant cumplettescha ina construcziun da vaider per la scolina il bajetg. Il material da la chasa da scola è betun e laina, quai ch’era modern da quella giada. Ozendi vegnissi fabritgà cun autras materialias, uschia il facit da la discussiun da podium.

Investiziuns en l’avegnir

La vischnanca ha planisà pliras investiziuns il proxim temp per la chasa da scola a Segl. Tranter auter duai dar in nov stgaudament, ina modernisaziun da l’illuminaziun ed er il tetg ha da vegnir isolà. Quella lavur prevesa Segl da cumbinar cun installar cellas solaras sin il tetg.

RTR Actualitad 12:00

Artitgels legids il pli savens