La via da Malögia tranter Segl-Föglias e Plaun da Lej sto d'enviern adina puspè vegnir serrada per raschuns da segirezza. A lunga vista duai quel problem vegnir schlià cun in tunnel. A curta vista duain sis pitgas per siglientar lavinas ed in sistem da surveglianza cun radar procurar per dapli segirezza. Il radar duai survegliar laviners che n'èn betg tangads da las pitgas. Da l'autra vart da la via surveglia il sistem in areal da fin 10 kilometers quadrat. Las lavurs per las pitgas ed il sistem da radar sur la via da Malögia avevan cumenzà durant il mais settember ed èn vegnidas terminadas la fin d'october.
Sco l'Uffizi da constricziun bassa dal Grischun ha scrit ils 22 da november, duai plinavant vegnir installà in sistem d'infurmaziun che duai far attent la glieud sin viadi avunda baud, sch'il traject pudess esser serrà.
Grazia a las mesiras duai la via vegnir pli segira per las utilisadras ed ils utilisaders. Las pitgas per siglientar lavinas duain ir en funcziun quest enviern. Il sistem d'infurmaziun duai esser avant maun la fin da december u l'entschatta schaner, scriva l'Uffizi da construcziun bassa.
