Las baselgias en l'Engiadin'Ota vegnan duvradas pli e pli pauc. Uschia manchian savens ils meds per il mantegniment e las sanaziuns necessarias.
Sco dapertut n'èn ils custs e las entradas betg pli en equiliber.
En il cas da Segl fissi da sanar las baselgias da San Lurench a Segl Baselgia, la Santa Margarita a Fex e quella da San Michael a Segl Maria. Las mesiras da sanaziun muntassan a var 1,2 fin 1,7 milliuns francs. Blers daners per la possessura, la plaiv evangelica d'Engiadin'Ota «Refurmo».
In’autra via
Discutà è era vegnì la proposta da la vischnanca da Segl da cumprar la baselgia a Segl Maria. Per evitar la vendita e chattar ina finanziaziun alterativa, è sa fundà a Segl ina societad da fauturas e fauturs cun il num «Alte Kirchen Sils».
Blera glieud da Segl stat davos nus, sco in motor grond che fa avanzar.
Cun raps da questa societad duess vegnir finanziada las sanaziuns da trais veglias baselgias ed accelerà ils process pertutgads – betg be cun raps dad indigens, mabain eir cun daners da turistas e turists. Quels sajan pronts sa sustegnair il project per mantegnair ils edifizis per l'avegnir.
«REFURMO» Engiadin'Ota è involvida
Il president da l’organisaziun evangelica, Luzian Schucan, di ch’ins apprezieschia fitg e promovia talas iniziativas or da la raspada. «REFURMO» vul segirar cun talas mesiras ch’ils custs da sanaziun da sias 22 baselgias, stimads sin var 8 milliuns francs, possian vegnir purtads da la plaiv.
Nus essan en emprima lingia responsabels per il salit da l'olma da nossa vischnanca, pir en segunda lingia per las construcziuns da la baselgia.
