Lucian Schucan da Zuoz presidiescha dapi il cumenzament da quest onn la plaiv evangelica d’Engiadin’Ota. Sia finamira è, da puspè chattar in contact pli intensiv cun la raspada e dar vita a la plaiv. Suenter la fusiun da las plaivs evangelicas da l'Engiadin’Ota, l’onn 2017, haja numnadamain adina puspè dà inquietezzas e midadas da persunal.
Adattà structuras
Uschia ha Refurmo, sut la batgetta da Lucian Schucan, realisà in tavulin che vegn fatg regularmain ed adina en in’autra vischnanca. Vinavant han ins decis d’organisar sper las duas radunanzas generalas – ina la primavaira ed ina l’atun – er radunanzas tematicas, nua ch’i possia vegnir discutà davart tematicas specificas.
En il passà eran las radunanzas generalas surchargiadas cun temas e nus n’avevan betg avunda temp per discutar tut las tematicas pli profundamain.
Strategia d’immobiglias
A l’emprima sairada tematica èn las immobiglias da la plaiv stadas en il focus. Per las 22 baselgias tranter Segl e S-chanf hajan ins numnadamain da sclerir co ed en tge furma che quellas duain vegnir utilisadas en l’avegnir. La finamira saja, d’elavurar durant ils proxims mais ina strategia d’immobiglias a lunga vista.
