La regenza svizra n'ha questa emna betg fatg sia sesida emnila a Berna, mabain a Müstair. Sin il program dal Cussegl federal è er stà in inscunter cun la presidenta da la Val Müstair Gabriella Binkert Becchetti e cun la populaziun sin il Plaz Grond.
Ils set cussegliers federals èn viagiads separà en la Val Müstair. La cussegliera federala Simonetta Sommaruga è arrivada gia il mardi saira cun l'auto da posta – ils ulteriurs sis cussegliers federals èn arrivads en trais helicopters.
I regia ina tscherta truscha ed er la polizia è stada preschenta, uschiglio è tut planisà ed organisà en detagl, rapporta il correspundent dad RTR al lieu Georg Luzzi. Circa 200-300 persunas sajan arrivadas a Müstair per l'apero e per nizzegiar l'occasiun unica da forsa discurrer insaquants pleds cun il Cussegl federal ubain la regenza grischuna.
L’inscunter ha prioritad – ma er in zic politica
L’inscunter cun la populaziun duai esser en il focus. Tuttina ha la presidenta Gabriella Binkert Becchetti vulì nizzegiar la schanza per deponer ina u l’autra tematica politica. Surtut ils plans da tut tenor vulair abolir il dazi al cunfin en Val Müstair vul ella discutar cun ils politichers. La consequenza fissan plazzas da lavur che giessan a perder.
Sin maisa duain dentant er vegnir temas che pertutgan l'entir Grischun, per exempel la problematica cun il luf. Suenter l'inscunter cun la populaziun è stà previs in gentar tranter il Cussegl federal e la regenza grischuna.
17avla giada «extra muros»
Dapi l'onn 2010 èsi la 17avla giada ch'il Cussegl federal tegna ina sesida ordaifer la chapitala da Berna – l'ultima è stada l'avrigl a Genevra.
Tschernì la Val Müstair ha il president da la Confederaziun Ignazio Cassis, sin iniziativa da la presidenta communala Gabriella Binkert Becchetti che ha spluntà tar la chanzlia federala a Berna. Cassis aveva numnadamain menziunà da vulair visitar las regiuns periferas durant ses onn presidial, cunquai ch'el ha mess quel sut il motto «innovaziun e diversitad». Uschia è naschida la primavaira l'idea da visitar l'unic chantun triling da la Svizra.
