Il sustegn da la Confederaziun per ovras solaras para er da dar schlantsch a projects en il Grischun. Fin ussa èn trais projects d'ovras solaras grondas enconuschents. Quai èn plans per in project a Scuol e dus a Tujetsch (Val Nalps e Scharinas). I dat dentant anc auters plans per projects d'ovras solaras en il Grischun, co il cusseglier guvernativ Mario Cavigelli ha fatg a savair la mesemna durant la sessiun da december.
Prest en mintga vallada pli gronda da noss chantun datti sforzs serius da vulair eriger talas ovras.
Concretisar nua che tge è planisà precis, n'ha el dentant betg vulì. I na saja er betg la chaussa dal chantun da far quai. Senza vulair ha Mario Cavigelli lura tuttina tradì dapli d'in dals projects ch'eran fin qua betg anc enconuschents. Pertge en ses pled al parlament ha el menziunà ch'ils sforzs serius per ina ovra solara a Samedan sajan gia enconuschents publicamain. Confruntà cun quest messadi da Cavigelli ha Gian Peter Niggli, president da la vischnanca Samedan, be pudì confermar ch'il cussegl communal saja vegnì infurmà che l'organisaziun Energia solara engiadinaisa s'occupia da questas ideas.
Samedan haja ina gronda surfatscha da terren cun diversas costas suleglivas che sajan predestinadas per in tal implant. Gist durant il temp actual, nua che discussiuns davart crisas e la mancanza d'energia èn omnipreschentas, saja impurtant da s'occupar dal tema d'energia regenerabla, di il president communal. En in proxim pass duain vegnir sclerids ils detagls concrets, sco territoris pussaivels u er las dimensiuns da l'ovra.
Suenter vegnian infurmads ils possessurs dal funs e la populaziun en chaussa. Sche l'implant duai pudair profitar da sustegn finanzial da la Confederaziun ha quel u almain ina part da quel d'esser vid la rait fin la fin da l'onn 2025.
