Siglir tar il cuntegn

Header

cuntegn

Silvaplauna Midada da planisaziun locala per nov hotel ed abitaziuns

Il suveran da Silvaplauna ha approvà a la radunanza communala la revisiun parziala da la planisaziun locala «Foppas». Entras quai èsi pussibel da bajegiar a Surlej in hotel cun 200 letgs, sco era tschintg chasas da pliras famiglias, cun radund 50 abitaziuns primaras. Plinavant duai dar ina chasa d'ina famiglia d'ina persuna privata. Per l'hotel e las chasas duai era dar ina garascha sutterrana cun radund 350-400 parcadis. Las parcellas pertutgadas tutgan a la vischnanca da Silvaplauna. Il mument è in grond parcadi sin questas parcellas. La vischnanca surdat las parcellas per l'hotel e las chasas da pliras famiglias en dretg da bajegiar. Tenor il messadi per la radunanza na sajan quellas parcellas uschia betg nizzegiadas sco la lescha davart la planisaziun dal territori pretenda.

A la radunanza communala è era vegnì approvà il preventiv per il 2024. Quel quinta cun in minus da radund 1,6 milliuns francs, tar investiziuns novas da 2,2 milliuns francs. Il pe da taglia resta tar 62% da la taglia chantunala simpla.

Plinavant ha la radunanza communala approvà la vendita da proprietad funsila tranter esters, sco era la vendita da proprietad da Svizzers a persunas da l'ester.

Ils da Silvaplauna han era approvà la cunvegna da prestaziun cun la Fundaziun da sanadad Engiadin'Ota (SGO) per la gestiun da las chasas d'attempads Promulins e Du Lac. Quella vala per ils onns 2024 fin a 2027 – cun la limitaziun che la cunvegna vala mo sche la SGO maina las chasas. Sch'ina autra interpresa surpigliass, stuess la cunvegna vegnir fatga da nov. Promulins duai avrir las portas il fanadur 2024 ed il center da tgira Du Lac il november 2024.

audio
Per tadlar: las novitads da las 17:00
ord RTR Audio dals 24.11.2023.
laschar ir. Durada: 3 minutas 36 Secundas.

RTR novitads 17:00

Artitgels legids il pli savens