Sch'il suveran dat glisch verda la fin da zercladur / il cumenzament da fanadur fundeschan las vischnancas Silvaplauna e Segl ensemen cun la Corvatsch SA la Infra Alpin SA. La societad d'infrastructura duai lura surprender la responsabladad per l'ennavaziun dals territoris da skis Corvatsch e Furtschellas. Previs è d'investir infra ils proxims 5 onns bundant 24 milliuns francs en novs implants d'ennavar e da transport. Il chapital total vegn ad esser radund 45 milliuns francs:
- Corvatsch SA: credit da 17 milliuns francs plus prestaziuns materialas en la valur da 3 milliuns francs
- Segl e Silvaplauna: mintgamai in emprest da 3 milliuns francs plus la garanzia per in credit da banca dad 8 milliuns francs
La finamira è da schlargiar la surfatscha d'ennavar sin 43%, oz 16%. Quai per segirar il manaschi da las pendicularas a lunga vista.
La fundaziun da la Infra Alpin SA è ina part dal project cuminaivel da las vischnancas e la Corvatsch SA davart la strategia per l'avegnir. Previs è d'investar infra ils proxims 5 fin 10 onns 50 milliuns francs en l'infrastructura d'ennavar, da transport, las pistas e la gastronomia. L'ennavaziun duai damai vegnir surpigliada da la Infra Alpin SA, il rest finanziescha la Corvatsch SA sezza.
