Da bun'ura sin la Capanna da l'Albigna
-
Bild 1 von 8. Da bun'ura sin 2'336 m. s. m.: Anc vesan ins la glina. Bildquelle: RTR.
-
Bild 2 von 8. Ordador chamona regia in'atmosfera tut paschaivla. Igl è fitg ruassaivel. Be mintgatant audan ins ina muntanella u in utschè. Bildquelle: RTR.
-
Bild 3 von 8. La bun‘ura curt suenter las 6:00 sa dasdan ils giasts plaunet. Cunquai che blers van a raiver, èn ils pli paucs gia vegnids or da letg avant quellas uras. Bildquelle: RTR.
-
Bild 4 von 8. Fertant ch'ils blers dorman anc, è la cuschina gia averta. Oz ha la scheffa preparà l'ensolver. Ella po ademplir quasi mintga giavisch. Bildquelle: RTR.
-
Bild 5 von 8. L'ensolver è pront, inclusiv la survista sin la grippa da granit. Bildquelle: RTR.
-
Bild 6 von 8. Ils sandwichs per la marenda ha il team gia preparà la saira avant. Tut quai ch'è fatg, è fatg. Bildquelle: RTR.
-
Bild 7 von 8. Uschia vegn er la rasada gia fatga da bun'ura baud. En il decurs dal di vegn quella lura servida sin la terrassa. Bildquelle: RTR.
-
Bild 8 von 8. Tge aventuras spetgan oz pomai sin ils giasts? Bildquelle: RTR.
Enturn las 6:00 la damaun èsi anc ruassaivel en la chamona. Be in pèrin saja gia partì anc pli baud per ir a far ina tura. Las bleras persunas che dorman en la Capanna da l'Albigna fan quai per ir a rampignar il proxim di. Là n'èsi er betg da sa dasdar gia cura ch'igl è anc stgir. Era dadora audan ins bunamain nagut – pia solen ruaus, sch'ina muntanella na tschivlass betg qua u là.
Suenter las 7:00 s'emplaina dentant la sala da la chamona pli e pli. Temp per ensolver sin 2'336 m s. m. Er il team da la chamona sesa ensemen per mangiar, discutar e planisar. Quai sajan ils paucs muments quiets en il mintgadi, manegia Aita Janett, ina dunna che gida mintgamai per in pèr emnas durant la stagiun da stad.
Suenter l’ensolver cumenza il di da lavur. Tgi guarda da las stanzas, tgi cumenza a lavar giu, tgi prepara autras chaussas per ils giasts.
-
Bild 1 von 12. Uschia cumenzan las lavurs endadens. Nettegiar las tualettas tutga – nunspetgadamain – tar las lavurs preferidas. Ins possia giudair in mument sulet. Bildquelle: RTR.
-
Bild 2 von 12. Il far si letg saja mintgatant dir, ma er cun far questa lavur possian ins giudair in zic quietezza. Bildquelle: RTR.
-
Bild 3 von 12. Bler temp per sasezzas n‘han las gidantras betg. Uschia dorman ellas er en ina chombra communabla. Bildquelle: RTR.
-
Bild 4 von 12. La prelavada vegn anc fatga a maun. Suenter datti in zic agid datti da la maschina. Bildquelle: RTR.
-
Bild 5 von 12. Er en cuschina gira adina insatge. Bildquelle: RTR.
-
Bild 6 von 12. E l‘avantmezdi vegn er gia preparada a la gronda per la tschaina. Bildquelle: RTR.
-
Bild 7 von 12. En in chantun en davos maisa sa chatta il biro – notabene in biro cun survista! Bildquelle: RTR.
-
Bild 8 von 12. Il tschaler è bain empleni cun verduras e mangiativas. Bildquelle: RTR.
-
Bild 9 von 12. La Capanna da l‘Albigna attira pitschen e grond. Enturn las 9:00 cumenza ina famiglia ina tura. Bildquelle: RTR.
-
Bild 10 von 12. E per ils pli pitschens spetga dadora la sablunera. Bildquelle: RTR.
-
Bild 11 von 12. Quels dus cumpogns cumenzan gest ina tura da plirs dis. Speranza na datti naginas vaschias vid ils pes. Bildquelle: RTR.
-
Bild 12 von 12. Fertant che la lavur cumenza endadens, bandunan ils giasts la chamona per ir a viandar u a rampignar. Bildquelle: RTR.
Sco pliras vias mainan a Roma, mainan era pliras vias tar la Capanna da l'Albigna: La pli cumadaivla va cun la pendiculara che parta da Pranzaira (sutvart dal Pass Malögia) enfin tar il mir da serra dal Lägh da l'Albigna. Da là cuntanschan ins suenter «mo» in'ura a pe la chamona che giascha amez pizza da granit.
I dovra il curaschi da prender liber
Gia la 11avla stad mainan Annamaria Crameri e Martin Ruggli la Capanna da l’Albigna. E pli u main tuttina ditg èn els geniturs – da dus uffants da 9 ed 11 onns. Uschia è la chamona durant la stagiun da stad sco lur segund dachasa, sco Annamaria Crameri ha ditg. Ed ils suentermezdis èn il temp cura ch’ils uffants pon quintar cun lur mamma e lur bab, per exempel cun ir ensemen a grillar u far in bogn en in aual.
Cun la blera lavur ch’ina chamona alpina pretenda, èsi tenor Martin Ruggli ina gronda sfida da coordinar quella cun la vita da famiglia. Ina via è da delegar als emploiads ed a las emploiadas. Lura dovria dentant er il curaschi da dir chau, jau sun davent, era sche la chamona è plaina – agiunta la scheffa Annamaria Crameri.
Quest temp intensiv en la Capanna d’Albigna na lascha nagin spazi per conflicts pli gronds. Quai saja lura da prender suenter las autras stagiuns, sincereschan l’um e la dunna rient. E per l’avegnir na fetschian els betg gronds patratgs. Uscheditg che la vita actuala constettia per tuts, cuntinueschian els.
-
Bild 1 von 15. La Capanna d'Albigna è in paradis per ir a viandar e raiver. Uschia stattan giasts savens er pliras notgs. Bildquelle: RTR.
-
Bild 2 von 15. L'avantatg da la chamona Albigna è l'access: Tgi che va a raiver sto purtar l'entir material «be» in'ura enfin tar la chamona. Igl è ina senda marcada alv-cotschen-alv, uschia èsi tuttina da guardar nua plazzar mintga pass. Bildquelle: RTR.
-
Bild 3 von 15. Er sche la spassegiada dal lai da serra enfin tar la chamona ha «be» cuzzà ina ura, fai bain da midar ils chalzers da viandar cun stgalfins da chamona. Bildquelle: RTR.
-
Bild 4 von 15. Da dis d'aura da bellezza fan 100 fin 150 giasts dal di in paus sin la terrassa da la Capanna d'Albigna. Bildquelle: RTR.
-
Bild 5 von 15. Martin Ruggli ed Annamaria Crameri beneventan dapi passa 10 onns ils giasts da la Capanna d'Albigna. Bildquelle: RTR.
-
Bild 6 von 15. Ma cumenzain il viadi da l'entschatta: Da la val maina la pendiculara en radund 10 minutas da Pranzaira en Bregaglia enfin tar il mir da serra. Ma oha, tgi ch'ha starment da l'autezza na guarda pli gugent betg en la profunditad. Perquai n'hai er nagina foto vers engiu ;-). Bildquelle: RTR.
-
Bild 7 von 15. Il lai da serra Albigna è vegnì construì la fin dals onns 1950, be aifer dus onns. El è circa dus kilometers lung e var 500 meters lad. Bildquelle: RTR.
-
Bild 8 von 15. Pervi dal project dal mir da serra è la chamona vegnida dischlocada ed engrondida. Uschia na sa catta la Capanna d'Albigna dapi il 1956 betg pli sin il livel dal mir da serra, mabain in zic pli ad aut sin 2'336 m s. m., sco ins vesa qua da lunsch. Bildquelle: RTR.
-
Bild 9 von 15. Tgi ch'è da viadi tar la chamona inscuntra er quel: il spiert da l'Albigna. Bildquelle: RTR.
-
Bild 10 von 15. Suenter traversar il mir da serra cuntinuescha il viadi sin ina senda vers la chamona. La spassegiada cuzza var in'ura. Bildquelle: RTR.
-
Bild 11 von 15. Curt avant la tegia passan ins sper in lai alpin idillic. Bildquelle: RTR.
-
Bild 12 von 15. Arrivada tar la Capanna d'Albigna sin 2'336 m s. m.! Bildquelle: RTR.
-
Bild 13 von 15. Da bell'aura – u meglier ditg da buna prognosa d'aura – visitan 100 fin 150 giasts la Capanna d'Albigna. Bildquelle: RTR.
-
Bild 14 von 15. Tegnair ad aut las chommas e giudair in aperitiv avant tschaina sin 2‘336 m s.m., uschia sa lascha giudair la survista. Bildquelle: RTR.
-
Bild 15 von 15. Quest perin resta pliras notgs sin la chamona. Durant il di giaudan els las sfidas en las muntognas, cunzunt cun ir a raiver. E vers saira als fascinescha la quietezza. Bildquelle: RTR.
Or da l'archiv
Il 2016 è la pendiculara – che maina fin al lai da serra Albigna – vegnida remplazzada. Lura ha RTR rapportà da las lavurs spectacularas.