Sin lai schelà da San Murezzan - Exposiziun e curs d'autos – quest onn senza caos da traffic

L'International Concours of Elegance - curt THE I.C.E - è in'occurrenza sin il lai da San Murezzan schelà - ed ha lieu il venderdi e la sonda. Per quel sa mida San Murezzan en in mecca per collecturs, amaturs d'autos ed entusiasts da design e lifestyle. Igl è ina maschaida dad in'exposiziun l'emprim di, ed elements da parada e cursa il segund di. E là datti premis supplementars sco «Best in Show», «Spirit of St. Moritz» ubain era «Icons on Wheels». 

Per la passiun per ils automobils

D'in traffic caotic ad in traffic coordinà cun trais mesiras principalas

Tar l'ediziun 2025 avevi dà uschè bler traffic che la via chantunala è stada bloccada per pliras uras. Il 2026 han ils organisaturs evità quest caos cun in concept da traffic.

Ils autos èn l'essenza da l'eveniment ed uschia tutga er dapli traffic vitiers. Per guidar quel ed evitar in caos, han ils organisaturs realisà per l'ediziun 2026 trais mesiras:

1. construì ina passarella da la staziun da la Viafier retica fin a l'ur dal lai
2. creà ulteriurs 2'000 plazs da parcar da Silvaplauna fin a Schlarigna
3. vendì 13'000 enstagl da 17'000 bigliets

L'idea è madirada e sviluppada sur decennis

L'idea oriunda per quest'occurrenza è naschida ils onns 80. Là era la finamira da cumbinar l'enviern da San Murezzan e las veglias turas ch'i faschevan cun Bentleys sin il lai schelà. Quai è stà il 1985 il mument inspiront per Marco Makaus da concretisar l'eveniment - l'onn da giubileum dal Cresta-Run.

Cun sustegn da la vischnanca da San Murezzan, dal Badrutt’s Palace ed ulteriurs sponsurs è naschì il project ch'è sa sviluppà sur onns e decennis. Il 2019 ha gì lieu l'emprima ediziun da test - la «Demonstration Edition». E suenter la pausa da corona ha l'emprima ediziun uffiziala gì lieu il 2022.

Pli e pli exclusiv – però era remartgà

Suenter la premiera il 2022 è il project vegnì sviluppà enavant cun procurar dapli attenziun e professiunalitad ed è ussa in punct fix en il chalender d'arranschaments da San Murezzan. L'eveniment è durant quels onns però era daventà adina pli exclusiv e da caracter pli elevà.

Per la passiun da la cursa

Ils pretschs per ils tickets èn vegnids auzads ed il dumber da participantas e participants è limità. Po esser che l'idea oriunda d'in eveniment spir passiun per automobils è daventà dapli in eveniment che punctuescha il lifestyle exclusiv. La creschientscha che l'eveniment ha registrà quels onns mussa però che l'event para tuttina da vegnir recepì era d'in publicum pli vast.