Ditg han ils organisaturs dal Snow Polo San Murezzan tremblà sche l’occurrenza po avair lieu u betg. Pervi da las temperaturas autas n’era la vetta da glatsch dal lai betg grossa avunda. Cun retard è l’installaziun da l’infrastructura per il turnier finalmain tuttina gartegiada. In levgiament er per il fundatur dal Snow Polo a San Murezzan, Reto Gaudenzi.
Per nus datti ina gronda satisfacziun che tut las stentas e numerusas uras investidas durant las ultimas duas emnas, han valì la paina.
Construì vegn per il turnier da polo ina plazza da 200 meters lunghezza e 100 meters largezza per il gieu. Ultra da quai tutgan differentas tribunas tar l’infrastructura, tranter auter er ina da VIP. Per ils giasts illusters stat er a disposiziun ina tenda stgaudada.
Il sport da polo datti gia dapi passa 2’600 onns. Oriundamain deriva il gieu da la Persia, oz numnadamain da l’Iran, l’Afghanistan, il Caschmir ed il nord dal Pakistan. Ils giugaders cumbattan sumegliant ad in gieu da hockey, dentant en sella da chavals.
Tradiziun a San Murezzan
Il gieu da polo han ils Englais introducì en Engiadina. Il 1959 è vegnì fundà il Polo Club San Murezzan per organisar turniers durant la stad. L’onn 1978 ha l’hotelier engiadinais Reto Gaudenz furmà l’emprim team da polo svizzer. La premiera sin il lai schelà ha gì lieu dal 1985. Entant s’è il turnier sviluppà ad in dals gronds eveniments d’enviern sin il Lai da San Murezzan.