La regenza grischuna dat glisch verda al project da renovaziun da la «Chesa Surtuor» da la societad Movimento a Samedan. Il chantun sa participescha cun maximalmain 320'000 francs vi dal project da 420'000 francs, scriva la regenza en ina communicaziun. Suenter la renovaziun duaja il bajetg esser accessibel senza barrieras e cuntegnair il lavuratori protegì, ina butia ed in magasin per il servetsch tecnic .
Butia ed in cafè amez Samedan
Ad ina radunanza extraordinaria il cumenzament da quest onn ha la societad Movimento decis da cumprar en il center da la vischnanca da Samedan las localitads dad in'anteriura drogaria. Là prevesa la societad da realisar ina tessaria cun butia ed in pitschen café. Cun la realisaziun da questa purschida prevesa la societad oravant tut da promover il contact tranter persunas cun in impediment corporal u spiertal e la societad. Tenor infurmaziuns da la presidenta da la societad Movimento, Prisca Anand, saja la finanziaziun segirada. Els prevesan dad avrir las portas la fin da l'onn 2022.
