La finamira dal studi è da mussar l’attractivitad da viver en la regiun e quai ord il punct da vista da giuvens creschids tranter 18 e 40 onns. Perquai ha Sophia Voelksen elavurà quel cun agid da 39 intervistas cun glieud giuvna da la regiun, sin incumbensa dal Svilup regiunal d’Engiadina Bassa.
Auta qualitad da viver en la regiun
Ils resuns van tuts en la medema direcziun: En general s'identifitgescha la gruppa en mira fitg cun la regiun. Quai surtut er grazia a facturs centrals sco la lingua rumantscha, la natira e la cuntrada culturala.
Discussiun da podi
L'attractivitad da viver ed abitar en la regiun Engiadina Bassa / Val Müstair è er stada tema d'ina discussiun da podi a Scuol cun exponents da differentas partiziuns. Er durant quest discurs è vegnì suttastritgà l'auta identificaziun cun la regiun cun accentuar ferm er la mancanza da plazzas da tgira per uffants e lieu abitabel per famiglias. Differentas organisaziuns e fundaziuns èn entant vid empruvar da dar cuntrapais a quest svilup.
Mancanzas enconuschentas
I dat dentant er potenzial e là èn ils temas ils medems. I vegn surtut giavischà ina promoziun da spazi per abitar pajabel per indigens, plazzas externas per la tgira d’uffants u er da metter dapli pais sin la digitalisaziun. Quai per exempel er per pudair sa participar a process politics.
La Conferenza da presidents da la regiun ha prendì enconuschientscha dal studi en sia ultima sesida als 9 da zercladur 2022. Il president Victor Peer renda dentant attent ch’i sa tractia d’in maletg d’ina singula gruppaziun dad abitants – ina ch’ins na resentia uschiglio strusch en il mund politic.
L’engaschament da persunas giuvnas manca cleramain en la regiun.
Singuls puncts e giavischs che vegnan menziunads sco conclusiun en il studi, sajan gia u vegnian integrads successivamain en l’Agenda 2030, uschia il manader da gestiun da la Regiun Engiadina Bassa / Val Müstair, Rico Kienz.
