La cussegliera guvernativa Carmelia Maissen ha prendì posiziun areguard ils differents sviaments che spetgan ils proxims onns en il chantun Grischun. En il tschancun final stat il project da sviament da la vischnanca da La Punt-Chamues-ch, sut la cundiziun ch'i n'entran naginas protestas. Quest project duess cumenzar la stad 2025, e vegn a custar radund 90 milliuns francs stan actual.
In ulteriur project che spetga sin sia realisaziun è la Punt San Gliezi, ina punt che duai colliar directamain la via dal Güglia cun la via dal Scanvetg. Actualmain lavuran ils responsabels vi dal preproject, la basa per realisar l’examinaziun publica.
Sviament Sta. Maria en Val Müstair
Tar quest project ins ha terminà il studi da variantas. Sco proxim spetg'ins la posiziun da la cumissiun naziunala areguard la protecziun da la natira e da la patria. Quella duess arrivar la primavaira 2023. Silsuenter pon ins instradar la procedura dal plan directiv.
Sviament da la vischnanca da Susch
Ina gruppa da lavur e vidlonder ad examinar las variantas, quella lavur vegn ad esser realisada a l’entschatta dal 2024. Sin questa basa èsi lura pussaivel d'instradar la procedura dal plan directiv.
Via tranter Segl e Plaun da Lej
Quest traject ston ils responsabels adina puspè serrar d’enviern per raschuns da segirezza. Tar quest project ha gì lieu ina consultaziun l’onn 2021. Actualmain ins è vi d'examinar variantas ed ina eventuala prolungaziun dal tunnel da segirezza. Mesiras a curta vista per dapli segirezza èn vegnidas realisadas l'atun dal 2022.