Oriundamain vuleva Andrea Gutgsell scriver in toc da teater per viandar tras Segl. La pandemia ha dentant fatg in stritg tras quest plan. Or dal toc da teater è perquai daventà in cudesch cun 200 paginas. In crimi enturn il cumissari Gubler – oriund Samedrin che viva dentant dapi onns a Turitg – ch'ha pers sia plazza ed è rivà en la Val Fex sco pastur. Là chatta el ina bara che sveglia puspè ses instict da cumissari.
Sch'i vegn a dar in ulteriur cudesch en avegnir, quai lascha Andrea Gutgsell avert. Schebain ch'el conceda, ch'el haja gia ina ni l'autra nov'idea en ses chau.
Premiera per l'autur
L'idea per l'istorgia era gia dapi in temp en il chau dad Andrea Gutgsell. Ch'el ha uss dentant pudì publitgar ella sco cudesch è tuttina stada ina gronda surpraisa per el.
Jau n'avess mai pensà ch'ina chasa editura prenda mes manuscrit. Impussibel.
Curt aveva el ponderà da laschar translatar il cudesch e publitgar el per rumantsch. Cunquai ch'el haja dentant chattà ina chasa editura haja el decidì da laschar el en tudestg.
