Siglir tar il cuntegn

Header

cuntegn

Tour de Ski Val Müstair L'emprim di è gartegià – malgrà autas temperaturas

Las emprimas cursas dal Tour de Ski en Val Müstair èn gartegiadas. La loipa ha tegnì, malgrà las temperaturas da primavaira, e cun la victoria da la Svizra Nadine Fähndrich è tut ì si perfetg. Tuttina han ils organisaturs da las curas dal Tour de Ski stuì far tut per che las cursas gartegian.

audio
Tour de Ski: La loipa ha tegnì
ord Actualitad dals 31.12.2022. Maletg: RTR
laschar ir. Durada: 3 minutas 51 Secundas.

Suenter ils sprints han ins vis ch'i va da far las cursas sin la loipa a Tschierv ch'è vegnida construida a partir dal cumenzament da december. Uschia era il levgiament suenter las emprimas cursas dal Tour de ski en Val Müstair grond. Era tar il responsabel per l'areal e per la loipa, Remo Malgiaritta. Sut questas cundiziuns n'ha el anc mai stuì far ina loipa.

Gia reponderà ina decisiun

La Federaziun internaziunala da skis FIS ha reponderà sia decisiun da la mesemna – da midar il furmat da persecuziun en ina cursa cun partenza da massa. Quai suenter ch'intginas squadras hajan expremì resalvas pertutgant la segirezza da las curridras e dals curriders, scriva la FIS sin sia pagina d'internet.

Traject scursanì

Pervia da las temperaturas chaudas han ins stuì scursanir il traject – quai da 3,3 kilometers sin 2,5 kilometers.

Il president dal comité d’organisaziun, Guido Mittner, è dentant da buna speranza che tut è pront per las cursas da questa fin d'emna:

audio
Guido Mittner: «Nus partin dal fatg che nus avain naiv avunda e che quai tegna.»
ord RTR Audio dals 31.12.2022.
laschar ir. Durada: 14 Secundas.

Ins ha stuì remassar naiv

Plinavant ha Guido Mittner ditg envers RTR ch'igl è vegnì ramassà dapertut anc naiv per preparar la loipa da las cursas ch'han lieu ils 31 da december 2022 ed il prim da schaner 2023. Ils ultims dis èn vegnids transportads cun camiuns radund 250 cubics naiv da l’Engiadin’Ota en la Val Müstair.

audio
Problems pervi da mancanza da naiv
ord Actualitad dals 27.12.2022. Maletg: RTR
laschar ir. Durada: 2 minutas 45 Secundas.
Guido Mittner
Legenda: Guido Mittner è da buna speranza che tut vegn ad esser pront ils 31 da december per las cursas dal Tour de Ski en Val Müstair. RTR

RTR actualitad 17:00

Artitgels legids il pli savens