Las pendicularas pateschan il pli fitg sut la mancanza da naiv. Be las pistas cun indriz da naiv èn avertas. E quai ves'ins er: Las pistas èn be tschintas alvas per lung las lantschas da naiv, dretg e sanester èsi brin. E cunquai ch'igl ha er anc pluvì enfin sisum las muntognas han las skiunzas ed ils skiunzs mancà. Curdin Baltermia, manader tecnica da las pendicularas, suppona che quai dettia quest onn be la mesadad da la svieuta dals ultims onns tranter Nadal e Bumaun. El è cuntent, che Savognin ha almain investì er quest onn en indrizs da naiv, «uschiglio n'avessan nus gnanc questas pistas.»
Avunda naiv per ils pitschens
In dals novs indrizs da naiv è installà tar il paradis d'uffants – e quel ha gia rendì. Ils emprims dis fraids da december ha la scola da skis pudì far ina flotta cuverta da naiv uschia ch'ils pitschens pon anc adina far qua lur emprimas emprovas d'ir cun skis. Il manader Lothar Künzli è cuntent cun l'occupaziun da la scola dals ultims dis.
Er en la butia da sport «Bananas» n'è la situaziun betg uschè mala sco tar las pendicularas. Stefan Moser quinta cun tranter 10% e 15% damain svieuta. Er sia fatschenta dependa fitg da la naiv.
«L'aura quinta e betg il quantum da naiv»
Nagins problems d'emplenir ses letgs ha Graziella Luzio da la pensiun Piz d'Err gì. Ella è cuntenta cun l'occupaziun e lauda ses osps, che na sajan betg cumplitgads: «Els vulan cunzunt vegnir en las muntognas e davent da la tschajera e lura èsi pli impurtant che l'aura è bella.» Tuttina dorma er ella natiralmain meglier, sche la meteo prognostitgescha naiv.
