Almain dapi l'onn 1864, dapi ch'ins mesira las temperaturas, n'èsi anc mai stà uschè chaud sco quest onn. E quest record valia perfin er sch'i dettia il november ed il december temperaturas sut la media. Quai communitgescha il servetsch da meteorologia Meteonews.
L'onn current è 1,7 grads pli chaud che la media dals onns 1991-2020. Tut ils mais dal 2022 èn stads memia chauds – cun excepziun da l'avrigl ed il settember. Il matg, fanadur e zercladur èn schizunt stads passa 2,5 grads pli chauds che normalmain. A la testa da questa rangaziun è l'october ch'è perfin stà 4 grads pli chaud ch'en la media.
Ils 10 pli chauds onns ha Meteonews mesirà tuts tranter ils onns 1994 e 2022. Dapi il cumenzament da las mesiraziuns l'onn 1864 è la temperatura media en Svizra s'augmentada per bun 2 grads.
