Uschè chaud sco quest october n'èsi anc mai stà dapi l'entschatta da las mesiraziuns il 1864. La media da l'entira Svizra è stada quest october 3,7 grads sur la norma da 6,7 grads dal 1991 fin il 2020. En blers lieus eran las temperaturas schizunt 3 fin 4,5 grads pli autas che la norma dals ultims 30 onns.
La raschun per questas temperaturas extraordinarias èn surtut ils vents dal vest e dal sid che transportan aria miaivla en Svizra. Surtut en ils auts hai dà temperaturas da record: Ad Arosa èn las temperaturas per exempel stadas l'entir mais 4 grads pli autas ch'en media. In record hai er dà dumengia cun 25,4 grads a Cuira. Uschè tard haja anc mai dà in di da stad en Svizra.
Setgira è nagin tema
La setgira na saja dentant nagin tema pli, di Roman Brogli dad SRF Meteo. Cunquai ch'igl haja adina puspè pluvì quest mais saja l'umiditad dal tarren puspè en il rom normal. En il Grischun datti grondas differenzas localas quai che pertutga la plievgia: Ad Andeer hai pluvì pli pauc che normalmain l'october - en l'entira Engiadina ed en la Val dar Rain hai perencunter pluvì dapli.
Consequenzas
La vegetaziun s'adattescha a las circumstanzas: I n'è per exempel betg vegnì endretg atun e la perioda da vegetaziun vegna in zic pli lunga. En l'agricultura han ins sentì che plantas che han ussa stagiun èn creschidas pli spert sco uschiglio. Ed ins ha stuì racoltar pli spert che normalmain. Consequenzas pli gravantas per natira ed ambient n'han las temperaturas pli autas da l'october dentant naginas.
Or da l'archiv
