Il sviament futur cumenza a l’ur dal vitg al sid e sa sparta da la via d’Engiadina actuala a sanestra. In tunnel da 584 meters lunghezza maina lura sut il vitg da La Punt vi, traversa il flum En ed arriva sin l’autezza da Madulain puspè sin la via d’Engiadina.
Ils custs per il project muntan a 83,5 milliuns francs, scriva la regenza. En il rom dal project remplazza il chantun er la punt sur l'En cun ina nova punt da radund 55 meters lunghezza. L'entir project da sviament augmentia la segirezza per las persunas ch'èn da viadi a pe u cun il velo, ma er per il traffic local. Sch’i na dat entaifer 30 dis nagins recurs tar la dretgira administrativa pon ins cumenzar la primavaira 2025 cun las lavurs da construcziun. Quellas duain cuzzar fin l'onn 2033.
Gia il cumenzament dals onns 1980 eri vegnì ponderà da construir il sviament a La Punt. L’onn 2014 era il project puspè vegnì reprendì e fin il november 2015 vegnì adattà a las pretensiuns dal temp. Sin fundament dals resuns e dals recurs è il project da sviament vegnì surlavurà essenzialmain e vegnì exponì da nov l'atun 2018.
