Il contract da cooperaziun regla la collavuraziun tranter ils trais partenaris, las vischnanca da Scuol e Val Müstair ed il Parc Naziunal Svizzer, che furman ensemen la «UNESCO Biosfera Engiadina Val Müstair».
Fin ussa valeva il princip d'unanimitad, quai vul dir che tut las persunas dal gremi strategic ston esser d'accord tar las decisiuns. Da nov vul ins introducir il princip da maioritad. Ultra da quai han ins vulì augmentar il dumber dals delegai da 6 sin 7 persunas: mintgamai duas da las vischnancas, duas dal Parc Naziunal Svizzer ed in president u ina presidenta independenta.
Las votantas ed ils votants da la radunanza communala da Val Müstair han temì che la vischnanca da Val Müstair pudess vegnir a la curta ed han refusà la revisiun cun 52 cunter 31 vuschs, uschè che vala actualmain enavant il contract dal 2016.
