La regiun da skis Minschuns na vesa betg la midada da clima sco privel per ses avegnir. Malgrà ch'ils responsabels han stuì serrar la regiun da skis per in’emna causa las nauschas cundiziuns da naiv quest onn.
Segund Daniel Pitsch, il mainagestiun da Minschuns, porschia il territori da skis avunda alternativas en cas sch'i n’avess betg avunda naiv per ir cun skis. Quai cun ina loipa da passlung, excursiuns per observar selvaschina, sendas da viandar, restaurant e via da scarsolar.
Daniel Pitsch na tema betg las investiziuns en ina pendiculara da la val en la regiun da skis. El vesa en quella ina schanza ed ina garanzia per l’avegnir. L’access per peduns e skiunzs daventass pli simpel e pli ecologic. In ulteriur avantatg fiss, ch'era persunas che tiran a niz mo las spiertas alternativas avessan da pajar per l’access. Daniel Pitsch vesa perquai plitost la mancanza da naiv mumentana sco motiv en pli da cuntinuar cun il project che da sepulir el.
Da la pendiculara dependa tut
Il 2017 ha la populaziun dà glisch verda per la realisaziun da la pendiculara, ma fin oz è quella betg vegnida realisada. La regiun da skis Minschuns ha realisà divers studis da factibilitad, fatg expertisas ed anc rapports d’experts. Encunter la revisiun parziala da la planisaziun locala «Sassa» han uniuns dal ambient fatg recurs. Tenor la presidenta da la vischnanca Gabriella Binkert-Bechetti vulan els tschertgar ina schliaziun cun las uniuns per l'ambient per evitar la via giuridica.
La pendiculara è la basa dal project, pir cur che quella retschaiva glisch verda vul ins proseguir cun il resort «La Sassa» a Tschierv ed era cun il project d’ennavaziun.
Pussà il manaschi per ina emna
Pervi da la situaziun da naiv interrumpa la regiun da skis il manaschi per in'emna. Quai dapi la dumengia, ils 8 da schaner fin e cun sonda, ils 14 da schaner. Il motiv saja la situaziun da naiv, ha ditg il manader da fatschenta Daniel Pitsch. L’emna d’interrupziun ch'è turisticamain pauc frequentada, causa la fora da schaner, vulan els nizzegiar per far lavurs da mantegniment da la pista.
Or da l'archiv
