Il suveran da Val Müstair ha approvà il credit da 6,9 milliuns francs per renovar la chasa da scola a Müstair. Quai cun 405 vuschs Gea cunter 260 vuschs Na. La votaziun a l’urna è stada necessaria, perquai ch’igl aveva dà in referendum cunter la decisiun da la radunanza communala il mars. Quel aveva pretendì che la fatschenta vegn a l'urna.
Referendum e votaziun a l'urna
Malgrà che la radunanza communala aveva decis per ina nova chasa da scola a Müstair, hai dà ina votaziun a l'urna. Quai aveva la Dretgira superiura dal Grischun decis intermediarmain. Tenor il derschader na datti nagins sbagls gravants en las infurmaziuns da la vischnanca, uschia che la votaziun po avair lieu. La decisiun è intermediara, perquai ch'il recurs è vegnì inoltrà relativamain curt avant il termin da votaziun.
En la materia sco tala vul la Dretgira superiura decider suenter la votaziun. Pia concret, sche la vischnanca ha infurmà avunda davart la finanziaziun da la nova chasa da scola Val Müstair, però era davart il destin da las chasas da scola ch'ins na dovra suenter la centralisaziun betg pli (Sta. Maria e Valchava). Quai era l'argumentaziun dals recurrents che pretendevan da spustar la votaziun.
In project cun lunga istorgia
Dapi passa tschintg onns discurr'ins en Val Müstair dad ina nova scola. Studis èn vegnids realisads, ins ha discutà davart ils custs ed era davart il lieu adattà. La vischnanca ha preschentà il project e laschà vuschar da quel il mars da quest onn.
Tut era cler, ma lura han 127 abitantas ed abitants suttascrit in referendum che pretenda dapli transparenza davart da la vischnanca.
Tenor nus n'ha la vischnanca betg preschentà tut las infurmaziuns necessarias per decider sur dal project scola.
La vischnanca sa dosta
Per la presidenta communala Gabriella Binkert-Bechetti ha la vischnanca infurmà pliras giadas ed en pliras furmas sur da l'intent da fabrica, da las finanzas ed era sur dal lieu adattà.
Jau ma dumond, pertge ch'els n’èn betg vegnids a dumandar ordavant.
La communicaziun e main il project è il problem
Da princip èn omadus d’accord ch'ina nova scola fetschia da basegn. Ma la procedura, co vegnir a la finamira per realisar quella, para dad esser in problem. Omadus han ina differenta tenuta quai che reguarda la moda dad integrar e communitgar cun la populaziun.
