L’idea da fusiunar è vegnida discutada gia dal 2019. La Val Müstair aveva laschà analisar la situaziun da la scola. Adina damain uffants en ils vitgs era il tema. Cun las trais scolas en differents lieus èn las expensas en avegnir memia autas, ina optimaziun da las structuras è necessaria.
La pandemia da corona ha però fatg in stritg tras il quint, il project è sa retardà. Pir il 2023 han ins tractà il tema e decis da vulair fusiunar las scolas, numnadamain d’avair mo ina chasa da scola en l'avegnir.
Cun l’idea d’avair mo ina chasa da scola, ha la vischnanca laschà examinar e projectar ina varianta. Quella preveseva custs da radund otg milliuns francs per sanar la scola a Müstair. Sin quai ha la vischnanca da Müstair, sut la batgetta da la presidenta communala Gabriella Binkert-Bechetti, infurmà da vulair redimensiunar il project sin radund tschintg milliuns francs.
Entant han ins surlavurà il project, quel prevesa ina sanaziun da la scola a Müstair e quai per 6.9 milliuns francs.
Il lieu
Müstair sa chattia giusum la val, Sta Maria percunter amez. Tuttina è la decisiun crudada per la scola a Müstair. Sco motivs vegnan numnads oravant tut ils custs da transport, il spazi enturn la scola, las plazzas da glatsch, ballape e tennis ed ina pli gronda sala da gimnastica. Cun ils 6,9 milliuns francs èsi previs da sanar la chasa fundamentalmain.
Ils custs
Da princip eran ils custs calculads enturn otg milliuns francs. Igl è però stà pussaivel d'adattar il project en differents puncts. Per exempel na prevesan ins betg pli d’auzar il tetg existent. Plinavant datti la pussaivladad da surpigliar ils locals da protecziun sco locals da scola. Uschia vegn la finala suttamess a la populaziun in credit da 6,9 milliuns francs. Tenor la presidenta communala Gabriella Binkert-Bechetti sa tracti dad in remartgabel import per la Val Müstair. Perquai prevesa la vischnanca da chattar fundaziuns ed organisaziuns che sustegnan l’intent da renovar la scola existenta.
Schliaziun transitorica
A partir da l'onn da scola 2025/26 van tut las scolaras e scolars a Sta. Maria a scola. Per l’onn da scola 2027 èsi lura previs dad esser pront cun la nova scola a Müstair.
