La stagiun da skis dal territori Minschuns en la Val Müstair è a fin. Sco quai ch'il mainagestiun Daniel Pitsch ha ditg envers la FMR, sforza in problem tecnic vid in runal da serrar il territori da skis pli baud che planisà. Causa las relaziuns actualas cun pauca naiv e paucas frequenzas era l'emna passada vegnì decidì da serrar las portas da la regiun da skis gia ils 15 da mars - pia in'emna pli baud che planisà. Ins sperava da pudair metter en funcziun il runal aifer trais dis. Suenter la serrada pli baud da questa dumengia e causa las paucas frequenzas, hajan ins lura decidì da serrar la stagiun gist per immediat.
Onn da giubileum senza far festa
Causa mancanza da naiv durant l’enviern, è la gronda part dal territori da skis stada serrada per pliras emnas questa stagiun. E quai gist durant l’onn da giubileum da 50 onns territori da skis Minschuns. Era las festivitads per il giubileum hajan ins spustà, causa ad in mortori en il decurs da la stagiun.
Uschea guarda il territori da skis enavos sin ina stagiun d’enviern 2025/26 pauc allegraivla. Era quai che pertutga las cifras. Ch'ins haja gì bler pli pauc frequenzas ed entradas durant questa stagiun. Numnadamain radund la mesadad dad auters onns. Però sut il stritg era damain custs. Per trair conclusiuns u ina bilantscha definitiva èsi tenor il mainagestiun Daniel Pitsch ussa però anc memia baud.