La regenza stgaffescha las premissas per spustar la senda da viandar «A la riva dal Rom» sin il traject tranter Sielva e Chasseras da la vart dretga dal Rom, scriva il chantun. Quai cun approvar la revisiun parziala da la planisaziun locala che la vischnanca da Val Müstair aveva concludì il mars 2022. Il motiv per il spustament è il trassé actual che maina – sin ina lunghezza da var 200 meters – sur la punt e sur il rempar da la via chantunala. Sin quest traject manca in passape sco er in vial da velos. Er las prescripziuns concernent la construcziun senza obstachels n'èn betg ademplidas. Perquai existia in privel per las viandantas e viandants. Questa mancanza duai vegnir eliminada.
La planisaziun actuala duai plinavant segirar la ruta alternativa da Lü a l'Alp Champatsch. Quella maina sin ina veglia senda chavorgia che sa chatta in pau sut la senda actuala. A medem temp èsi planisà d'abolir la senda da viandar Valpaschun. Il trassé actual tranter Lü e l'Alp Champatsch maina sin ina via agricula e forestala. Sper l'utilisaziun tras il traffic motorisà cumpiglia quest traject er rutas da viandar - quai ch'haja adina puspè chaschunà conflicts tranter viandants, ciclistas ed automobilists. Tras il spustament da la senda da viandar posiia la situaziun vegnir mitigiada. Grazia a questa mesira pon era vegnir quietads dus territoris impurtants per la selvaschina.
