La procedura è lunga: gia dapi divers onns è la vischnanca da Valsot vidlonder d'elavurar la revisiun totala da la planisaziun locala. Oravant tut la lescha da fabrica dat blera lavur. Il 2013 han las duas vischnancas Tschlin e Valsot fusiunà.
En connex cun questa revisiun hajan ins ussa finalmain ina lescha cuminaivla sur tut la vischnanca, natiralmain sut la circumstanza ch'i na dat nagins recurs ils proxims dis.
La zona da construcziun – il tema central
La vischnanca da Valsot ha redimensiunà radund 6'900 m² terren da construcziun. Il redimensiunament è ina pretensiun che bleras vischnancas han d’accumplir. Sulettamain tschintg parcellas stattan uss anc en discussiun.
Jau sun schont in zichel dischillus che nus stuain discutar anc d'in ulteriur redimensiunament.
La revisiun totala è ina gronda lavur e sfida per las vischnancas. Sper la reelavuraziun da la lescha stoppian ins er examinar tut las zonas sco p.ex. zonas da privel, zonas d’industria, da guaud, palids, parcadis e bler auter. Lura vegnan era tiers tut las sendas per peduns, vehichels e velos.
La vischnanca da Valsot ha finalmain retschavì la resposta da la regenza grischuna. Uss è quella publitgada, uschia che la populaziun ha la pussaivladad d'avair invista per ponderar da far eventuals recurs.
