la vischnanca Samignun, ina val laterala giusum l’Engiadina Bassa, è transibla sur la Svizra e sur l’Austria. La via chantunala svizra n'è betg ideala per viagiar cun bus da posta pervia ils tunnels. Divers èn ussa vegnids engrondids, ma betg tuts. Quai pudess durar anc intgins onns.
Dapi blers onns va perquai la posta Svizra sur l’Austria per vegnir en Samignun. Quella cunvegna scroda la fin da l'onn 2027. Perquai che l’Austria è commembra da la Uniun europeica sto Vienna dumandar emprim la UE per il consentiment per prolungar quel contract.
Nus avain grond interess da pudair viagiar era en avegnir sur l’Austria.
La posta svizra vul proseguir
Tenor il key account manager dal chantun Grischun, Christian Kindschi è quel traject attractiv. Cun viagiar sur l’Austria passan ins era pitschnas vischnancas austriacas, nua che blers giasts viagian fin en Samignun oravant tut per ir culs skis. Da la vart svizra n'è quai betg il cas.
Actualmain èn las tractativas tar la Confederaziun svizra e l’Austria. La decisiun da la UE stuess seguir durant la primavaira. Tenor infurmaziuns da l'Uffizi d’energia e da traffic dal Grischun spetgan ins anc sin glisch verda da la Confederaziun.