La Val S-charl n’è betg mo ina val ch'attira stad per stad millis e millis da persunas, dentant era ina val privlusa. Oravant tut sch'i dat malauras. Sco per exempel durant las stads 2015 u 2017, nua che diversas bovas han inundà cumplettamain la val e demolì en plirs lieus la via.
Era sch’i n'ha mai dà accidents mortals, ha la vischnanca da Scuol laschà installar in nov sistem d’avertiment automatisà. Quel saja unic en Grischun per ina via da muntogna. Quai per il motiv ch'i sa tracta d’ina via da muntogna publica. Cun quest nov sistem ha la vischnanca a partir da la proxima stad en cas da malauras la pussaivladad da serrar la via che maina en la Val S-charl cun in smatg sin il buttun. Dalunga che las duas barrieras, ina sur San Jon e l’autra curt avant la fracziun da S-charl, sa serran, glischan sin in tschancun da var otg kilometers sis glischs. Quai èn uschenumnadas «inslas da segirezza», nua che las persunas ch’èn da preschent sin via duain restar, enfin che la via vegn puspè averta.
Damai, in sistem che na simplifitgescha betg mo la lavur per ils lavurants communals, mabain che augmenta era la segirtad sin via per bainquant.
-
Bild 1 von 4. La Val S-charl ussa ... Bildquelle: RTR, Dario Müller.
-
Bild 2 von 4. ... la Val S-charl durant la stad 2015. Bildquelle: RTR, Dario Müller.
-
Bild 3 von 4. Ultims tests tar la barriera en vischinanza da San Jon. Bildquelle: RTR, Dario Müller.
-
Bild 4 von 4. Ina da las sis inslas da segirezza. Bildquelle: RTR, Dario Müller.