Siglir tar il cuntegn

Header

cuntegn

Viafier retica En Engiadina Bassa curseschan bainprest puspè il trens

A partir da glindesdi ils 7 d'october po il traffic puspè rullar tranter Susch e Scuol-Tarasp. Dapi il mars ha la retica stuì far pliras renovaziuns sin il traject, uschia ch'ils passagiers èn vegnids transportads ils ultims set mais cun bus tranter Susch e Scuol-Tarasp.

Durant ils ultims set mais ha la Viafier retica renovà las staziuns da Sagliains e Lavin. Quellas èn vegnidas modernisadas e concepidas tenor ils basegns da persunas cun impediments. Fin la stad 2020 datti anc lavurs da finiziun vid las staziuns.

A la staziun da Guarda è vegnida renovada la surstructura. Plinavant èn las rodaglias en il tunnel da Tasna vegnidas renovadas. Era hai dà pliras lavurs da renovaziun vid mirs da sustegn e vi da construcziuns da lain.

Magnacun e Giarsun anc betg finids

Purtret da l'entrada dal tunnel Giarsun en nov vestgì.
Legenda: L'entrada dal tunnel Giarsun splendura en in nov vestgì. Dal tut n'èn las lavurs dentant anc betg a fin. MAD, Viafier retica

Raschun per la serrada totala dal traject èn stadas las renovaziuns vi dals tunnels Magnacun e Giarsun tranter Guarda ed Ardez. Questas lavurs n'èn anc betg finidas e vegnan manadas enavant durant ch'il traffic culla puspè. Ord quest motiv curseschan anc fin ils 29 da november mintgamai tranter las 21:30 e las 06:30 bus da remplazzament tranter Guarda e Scuol-Tarasp. Quests curs èn er inditgads uschia en l'urari.

Ord l'archiv

Il zercladur era vegnì enconuschent che las lavurs duran in mais pli ditg che planisà:

Video
In mais retard per lavurs da la Viafier retica en tunnel Magnacun
Or da Telesguard dals 19.06.2019.
abspielen

RR novitads 12:00