Siglir tar il cuntegn

Header

video
Emprim simposi da vin «Wine Hub Alps» en Engiadina
Or da Telesguard dals 11.09.2023.
laschar ir. Durada: 4 minutas.
cuntegn

Vin da Scuol L'idea in «zic narra» survegn bunas notas dals experts

A La Punt Chamues-ch han questa fin d’emna referì expertas e scienziadas da vin davart las sfidas da l’industria da vin. Ils divers referats han mussà che la branscha fa anc memia pauc per la protecziun da l’ambient. Il simposi che duai ussa avair lieu mintga dus onns, vul daventar ina plattafurma che gida a far vegnir pli persistent la branscha.

Participà al simposi ha er Gian Luca Vitalini. A Scoul ha el plantà questa primavaira ses emprims 120 vits. Cun il resultat intermediar è el fitg cuntent. Fin en dus, trais onns vul el racoltar sias emprimas ivas per far vin.

audio
La Punt: Emprim simposi da vin «Wine Hub Alps» en Engiadina
ord Actualitad dals 08.09.2023. Maletg: pixabay
laschar ir. Durada: 3 minutas 16 Secundas.

 Quai saja ina idea in zic narra, ma er interessanta, ha ditg José Vouillamoz. Il biolog perscrutescha la DNA da las vignas ed el vala sco gronda corifea en la branscha da vin.

Envers RTR ha José Vouillamoz ditg che Vitalini haja plantà ina sort robusta e ch'i saja bain pussibel ch'el reussescha. «I dat funtaunas che mussan ch’igl ha dà vignas a Scuol gia en il temp medieval. Quellas vignas en lura svanidas. Ma cun la midada da clima po quai midar», di il Valesan José Vouillamoz.

Era en il Tirol dal sid u en Spagna giajan ils viticulturs pli e pli ad aut cun lur vignas. I saja perquai bain pussibel che l’Engiadina bassa saja fin en 50 onns ina regiun da vin.

Miriam Grischott führt ihre eigene Wein-Beratungsfirma
Legenda: Miriam Grischott ha in atgna firma da cussegliaziun da vins. Oriundamain è ella da La Punt Chamues-ch. RTR

Persistenza en la branscha da vin

Tras discussiuns e referats èn ils participants vegnì a savair dapli davart las sfidas e schanzas ch’ils producents da vin èn confruntads di per di. Ch’i saja dad ir cun il temp e s’adattar als basegns e giavischs da las consumentas ed dals consuments, uschia l’experta da vin.

In dals temas è per exempel il trend tar ils giuvenils, che quels baivan pli e pli gugent er vin senza alcohol.
Autur: Miriam Grischott academicra da vin Küsnacht / La Punt Chamues-ch

Er l’influenza dal midament dal clima sin la viticultura è vegnida tematisada. Las temperaturas nunusitadas u er la mancanza d’aua. Miriam Grischott ha menziunà er dumondas ch’èn avertas en connex cun l’emballascha dal vin.

Er las buttiglias da vaider, ils cucuns da vin e la producziun da quel material d’emballascha vegn mess en dumonda.
Autur: Miriam Grischott organisatura 1. simposi da vin

Radund 50 participantas e participants èn stads annunziads per l’emprim inscunter en Engiadina. Prevesì saja da repeter il simposi, il pli baud en dus onns, di l’organisatura da l’occurrenza.

RTR actualitad 12:00

Artitgels legids il pli savens

Scrollar a sanestra Scrollar a dretga