Ulteriuras mesiraziuns ed examinaziuns han resultà che ina aboliziun dal scumond da trair a niz la chamona e pussaivla sut cundiziuns, uschè la presidenta communala Aita Zanetti.
Cundiziuns per ina eventuala avertura
Ils giasts da la chamona ston vegnir infurmads adequatamain sur da la situaziun, plinavant ston ins preveder mesiras per infurmar tut la populaziun che sa chattia en quella regiun periclitada. Il Club alpin svizzer Engiadina Bassa vegn incumbensà da realisar in concept cun mesiras per segirar meglier l'object sez.
La vischnanca prevesa da communitgar en furma da tablas d’infurmaziun, via pagina dad internet, ma er las chamonas e vischnancas vischinas vegnan infurmadas en detagl sur da la situaziun.
La vischnanca da Scuol ha relaschà in decret correspundent nua ch'il Club alpin svizzer Engiadina Bassa ha la pussaivladad da far recurs cunter las mesiras.
Posiziun dal CAS Engiadina Bassa
Sche la chamona Tuoi avra sut questas circumstanzas puspè sias portas questa stad n’è actualmain anc betg tschert. Sco il president da la secziun dal CAS Engiadina Bassa Heinz Gross ha ditg envers RTR hajan ins ussa d'evaluar ensemen cun il guardiachamona sch’ina gestiun sut questas novas circumstanzas rendia insumma. Ins saja dentant da buna speranza e surtut er cuntent da sentir che la situaziun saja main acuta che supponì oriundamain.
Privel dal Piz Buin Pitschen
Gronds moviments da crappa al Piz Buin Pitschen en cumbinaziun cun naiv avevan sfurzà la vischnanca da Scuol d'ordinar l’enviern passà ina serrada preventiva da sendas e rutas en il territori sco era da la chamona Tuoi.
Or da l'archiv
