Mintga vischnanca aveva avant la fusiun in'atgna lescha da bajegiar e differentas zonas da fabrica, mastergnanza ed era zonas verdas. Cun la fusiun prevesan ins d'armonisar la lescha da fabrica e las zonas sur tut las vischnancas fusiunadas. Scuol ha perquai relaschà il 2017 ina zona da planisaziun sur tut la vischnanca, quai per pudair far l’armonisaziun.
In'armonisaziun dovra temp
La procedura per realisar respectivamain chattar ina schliaziun sur tut il territori dovra fitg bler temp. Latiers vegn ch'era il chantun ha da dar glisch verda per l'entira procedura la fin.
Actualmain ha la vischnanca da Scuol deponì la planisaziun tar il chantun per in'examinaziun preliminara, suenter quella suonda in'exposiziun da cooperaziun. Pli tard sto lura la vischnanca laschar acceptar la planisaziun communala a l’urna. Scuol ha perquai prolungà la zona da planisaziun fin il favrer 2025.
