Tschlin vul daventar in center per musicantas e musicants da la musica populara. Venderdi saira e vegnida infurmada la populaziun da Valsot. Sut il num «Tschlin – musica en vischnanca» vulan els realisar or da la chasa da scola in hotel ed or da la halla polivalenta in local per provas e concerts. Plinavant duai vegnir realisà ina ustaria cun il num «Bun Tschlin». L’avertura è previsa la primavaira 2024.
Tschlin è ina vischnanca nua che la musica viva ed ha ina enorma impurtanza.
Musica duai esser il tema central, questa idea era vegnida sin maisa gia durant il lavuratori che ha gì lieu l’onn passà. Uss han ins elavurà in project pli detaglià. A Tschlin ha la musica ina gronda impurtanza, plinavant ina gronda tradiziun. Quest’onn festivescha la societad da musica il 150avel anniversari e da Tschlin deriva er la enconuschenta musica «Ils Fränzlis da Tschlin», fundada il 1982.
