«Nus sperain che nus chattian ina schliaziun e ch'el possia restar en sia chasa», di Marion Ammann. Ella ha ingiantà la chasa d'abitar dad Adam Quadroni. Ed ella punctuescha: «Nus sperain che nus possian reducir in pau sia malencurada.»
Persuna singula u gruppa da sustegniders?
En quest connex n'èsi betg cler, sche Marion Ammann è suletta u sch'ella stat per ina gruppa da sustegnidras e sustegniders. Ella sezza na vul per il mument betg anc dir dapli en chaussa.
L'interess per l'ingiant è stà grond. Var 50 persunas èn stadas preschentas a Scuol. Ed Adam Quadroni era medemamain al lieu.
Er la chamona da chatscha va a sustegnidra
Gia avant l'ingiant ha dà famas che sustegnidras e sustegniders dad Adam Quadroni cumprian la chasa ed al laschan lura abitar en quella. Propi augmentà ha tar l'ingiant da la chasa d'abitar sper la banca Raiffeisen mo pli la sustegnidra da Quadroni, Marion Ammann.
E la dunna dal chantun Soloturn ha survegnì l'object per 1'435'000 francs. Medemamain ha ella survegnì la tegia. Qua han bain tschintg autras persunas mintgamai augmentà la summa per la tegia. La finala ha Marion Ammann dentant ingiantà la tegia per 450'000 francs – 350'000 dapli che la valur commerziala.
Bler anc betg sclerì
Sche Adam Quadroni po propi restar en chasa, n'è tuttina anc betg segir. Er Marion Ammann na po betg dir dapli en quest connex: «Jau stoss l'emprim zavrar tut.» I resta era intschert, danunder ch'ils daners per las chasas vegnan. Cler è percunter che Adam Quadroni po liquidar cun l'ingiant passa la mesadad da ses debits ch'el ha tar bancas, interpresas e tar persunas privatas. Circa 1,7 milliuns francs debits restan dentant anc averts.
Igl è in fitg grond levgiament.
Adam Quadroni è medemamain s'exprimì suenter l'ingiant. En connex cun sia chasa da dimora ha el ditg: «Igl è in fitg grond levgiament. I n'è anc betg finì, igl è in emprim pass, ma jau crai ch'ins possia ussa far bler. »
