La radunanza communala da Zernez ha adattà il sboz per ina revisiun da la lescha da chamonas communalas. Suenter che la suprastanza ha preschentà il sboz hai dà ina vasta ed intensiva discussiun. Lura è vegnì votà davart duas propostas.
- La proposta dad in votant da betg pli excluder possessuras e possessurs d'atgnas chamonas d'annunziar per ina chamona communala han ils votants e las votantas refusà cun 45 cunter 17 vuschs.
- Acceptà cun 29 cunter 22 vuschs ha la radunanza la proposta da betg far ina differenza tranter la fracziun da Brail e quella da Zernez. Questa proposta han convischins da la fracziun da Brail fatg. Il sboz è vegnì adattà ch'i na vegn betg definì in plan da perimeter da chamonas per la fracziun da Brail.
Sco Riet Denoth, il vicepresident da la vischnanca da Zernez, aveva ditg a RTR, era gist la separaziun da Brail e Zernez in punct principal per la midada. Quel è uss gia avant la votaziun a l'urna giud maisa.
Ils 18 da zercladur po la populaziun decider a l’urna davart la revisiun da la lescha da chamonas communalas.
Quint 2022 e concessiun d'aua
La vischnanca da Zernez serra il quint dal 2022 cun in gudogn da 557’000 francs. Quai tar expensas da var 20,3 milliuns francs ed entradas da var 20,9 milliuns francs. La radunanza communala ha approvà unanimamain il quint. Plinavant han ils da Zernez era approvà in contract da concessiun per la retratga d’aua da fund cun la firma Terretaz SA.
Or da l'archiv:
