La regenza sto examinar las incumbensas da l'Uffizi da migraziun e protecziun civila. Tar quellas tutga er il mantegniment dal center regiunal per documents d'identitad a Zernez. I va per examinar il potenzial da spargn.
Ina da las pussaivlas mesiras da spargn fiss da serrar il center. Era sche la regenza ha anc da prender uffizialmain posiziun en chaussa, na quinta Peter Peyer, il manader da l'uffizi, betg che quel vegnia serrà.
Quai tschantscha encunter ina serrada
Per l'ina dess quai lungas vias per la populaziun en l'Engiadina per obtegnair documents d'identitad, per l'autra cuntrafaschess quai ad ina autra incumbensa da la regenza. Il Cussegl grond pretenda da la regenza da pussibilitar en plirs lieus a lavurers e lavureras da stagiun d'obtegnair documents d'identitad. Da serrar il center a Zernez cuntrafaschess a quai.
Manar il center cun sis persunas emploiadas custia il chantun intgins tschient milli francs ad onn. In ulteriur center da documents d'identitad datti be a Cuira. Ina decisiun finala da la regenza saja da spetgar tenor Peyer anc quest onn.
