I saja grev da dir quants erizuns cha vivan effectiv anc en il chantun Grischun. Ins haja però badà, che la populaziun dals erizuns saja ida enavos, di Luis Lietha, manader da la partiziun natira ed ambient.
L'erizun è il mument sco potenzialmain periclità sin la glista cotschna.
Dapi il 2022 vala l'erizun sco potenzialmain periclità. L'animal spinus n'è pia anc betg en privel da svanir, ma ins stoppia far attenziun.
-
Bild 1 von 4. L'erizun sa zuppa gugent en mantuns da feglia. Bildquelle: Keystone.
-
Bild 2 von 4. El viva gugent en guauds da feglia ed en giardins – nua ch'ins lascha l'enviern ils mantuns da feglia per ses sien d'enviern. Bildquelle: Keystone.
-
Bild 3 von 4. L'animal spinus s'auda tier la famiglia dals maglia-insects – e n'è betg in ruider sco per exempel las lieurs. Bildquelle: Keystone.
-
Bild 4 von 4. En cas da privel sa zuglia l'erizun e drizza sias spinas vers dadora. Bildquelle: Keystone.
Il chantun Grischun n'è – en congual cun la Bassa – betg il lieu propi addatà per l'erizun. Quest animal preferescha numnadamain guauds da feglia. Da quels datti en il Grischun pli paucs ch'en la Bassa.
Dischurden empè da pastget englais
Ultra da quai han els gugent giardins. Surtut giardins cun blera structura – cun chaglias, bostgaglia, ervas e mantuns da feglia, nua ch'els pon sa zuppar e viver. Deplorablamain vegn quest «dischurden» rumì davent da bleras persunas. Per l'erizun è quai in grond problem.
En l'enviern na duess ins betg rumir ils mantuns da feglia. I possia esser ch'in erizun fa là ses sien d'enviern, declera Luis Lietha. Cun rumir la feglia pon ins lura blessar l'animal cun ils guaffens.
In motiv principal, perche che l'erizun è sin la glista cotschna è ch'el ha betg pli avunda spazi da viver. Ils responsabels e las responsablas dal chantun Grischun èn era vidlonder da meglierar quel spazi. En il rom da la strategia da biodiversitad vegnan promovids giardins ecologics, tant sin funs chantunal sco era privat.
Luis Lietha è optimistic ch'ins possia cun las dretgas mesiras e cun l'agid da la populaziun meglierar la situaziun dals erizuns cun crear nov spazi da viver.