La giuvna tgirunza che vul restar anonima lavura dapi l’entschatta da ses emprendissadi, avant tschintg onns, en il sectur da sanadad. Ed ella n’è insumma betg cuntenta cun la paja ch'ella survegn.
Nus na gudagnain betg avunda per quai che nus faschain. Nus lavurain fitg bler ed igl è ina pressiun fisica e psichica.
La giuvna da 21 onns lavura 80% en ina chasa da tgira. Sch'ella guardia dentant sin sias uras da lavur, sche lavuria ella in pensum da 100%, e quai cun ina paja che na cuntentia betg.
Bleras raschuns per dapli paja
Il grond squitsch psichic e fisic èn be duas da bleras raschuns, daco ch'ella e sias collegas da lavur stuessan gudagnar dapli, di la tgirunza.
Nus avain extrem blera responsabladad. E nus stuain lavurar blers dis cura che autra glieud ha vacanzas u liber – n’emporta betg sch’igl è Nadal u fin d’emna. Perquai stuessan nus schon survegnir 1'000 francs dapli, chat jau.
Vitiers vegnia ch'ella e bleras da sias collavuraturas e collavuraturs hajan mal il dies e la schanuglia. Tals mals na vegnian er betg pli supportabels per exempel cun acziuns da splatschar ina minuta per il persunal da tgira. Quai sajan bain bels gests, dentant na midian quellas acziuns nagut vid la paja. Il mintgadi giaja vinavant exact tuttina, di la giuvna.
Uschia na saja la paja betg ina gronda motivaziun da restar tar la clamada, malgrà che la lavur sco tala plascha fitg a la giuvna.
