Ospitals e chasas da tgira - Dapli paja? Nagina chapientscha da l’uniun d’ospitals - Novitads

Dapi onns recloman tgirunzas ed il persunal da tgira ch’i dovria meglras pajas. Cun corona è la pretensiun anc s’accentuada. Nagina chapientscha demussa Daniel Derungs per questa pretensiun. El è mainafatschenta da la federaziun grischuna d’ospitals e da las chasas da tgira.

Jau sun da l’avis ch’il persunal da tgira gudogna a moda adequata

Autur: Daniel Derungs manader da la federaziun grischuna d'ospitals e chasas da tgira

Daniel Derungs discurra ord l’optica da la direcziun d’ospitals. Sis onns ha el fatg part da la direcziun dal ospital chantunal e sis onns è el stà directur dal ospital en il Principadi dal Liechtenstein.

audio

Pajas en la tgira: Vista dals ospitals e chasas da tgira

ord Actualitad dals 07.07.2021.

laschar ir. Durada: 2 minutas 4 Secundas.

Problem dal temp parzial?

Il problem saja che blers en la tgira lavurian a temp parzial. Els na survegnian lura betg ina paja da 100%. Perquai saja la paja halt pli bassa, ma quai dependia da la procentuala dal pensum. Che blers lavuran a temp parzial pervia dal squitsch na lascha el betg valair.

En auters jobs èsi era strentg.

Autur: Daniel Derungs anteriur directur dal ospital en il Principadi dal Liechtenstein

Per in augment da paja duvrassi plinavant era dapli daners. Cun las tariffas actualas na possian ils ospitals e las chasas da tgira betg sa lubir da pajar megliers salaris.

Tants acturs gioghian ina rolla en il sectur da sanadad, di cusseglier guvernativ Peter Peyer. Sper il maun public hajan las assicuranzas, differents purtaders ed instituziuns da sanadad in pled en chapitel.

Cun ils ospitals fa il chantun cunvegnas da prestaziun. Na pudess il chantun pia betg pretender meglras pajas en questas cunvegnas? La finala oblighescha il chantun ils ospitals en questas cunvegnas era da scolar persunal da tgira.

Quai na saja betg pussaivel, di il minister da sanadad. Per fixar pajas en las cunvegnas da prestaziun duvrassi ina basa legala. La regenza avess gugent pretendì in contract da lavur collectiv u definì pajas minimalas en las cunvegnas da prestaziun. Ma il cussegl grond, che vess stuì stgaffir la basa legala persuenter, n’haja betg vulì gliez.

La regenza haja uss intimà ils partenaris socials – uniuns da persunal ed ils ospitals e las chasas da tgira – da manar discurs davart las cundiziuns da lavur e davart las pajas. I dettia in tschert squitsch d’agir entras la mancanza da persunal da tgira, di Peter Peyer.

Tscherts ospitals vesian la necessitad d'agir per impedir ch’il persunal giaja tar la concurrenza. «Quai vegn ad avair consequenzas, ma i na va betg uschè spert», di il cusseglier guvernativ.