Karin Iten chala sco incumbensada da prevenziun da l'uvestgieu Cuira. Quai ha communitgà l'uvestgieu. Ella na possia betg acceptar che dunnas èn exclusas da l'uffizi clerical pervia da ses senn per giustia.
Codex da cumportament
Karin Iten è engaschada dapi trais onns per l'uvestgieu da Cuira e per las set baselgias chantunalas. Ensemen cun ses collega Stefan Loppacher ha ella concepì il document «Codex da cumportament co ir enturn cun pussanza». Il codex saja al cumenzament vegnì refusà, per exempel dal circul clerical da Cuira conservativ e dal decan Rudolf Nussbaumer. Tenor Iten è quel uss dentant betg pli contestà ed impurtant per la lavur da prevenziun.
L'uvestg da Cuira Joseph Maria Bonnemain deplorescha che Iten dat giu sia plazza. En la communicaziun a las medias scriva el ch'el stima la cumpetenza d'Iten. En il futur vegnia Iten a lavurar en ina organisaziun da protecziun d'uffants betg colliada cun la baselgia.
