La galaria Hauser & Wirth a San Murezzan preschenta Alberto Giacometti co ins enconuscha betg uschè bain el: fatschas e cuntradas da sia patria. In'exposiziun cun in caracter intim che reunescha purtrets deditgads a sia famiglia da l'artist e vistas alpinas da Stampa e Malögia, ils lieus allontanads da la Bregaglia, nua ch'el è turnà enavos adina puspè durant sia vita.
In'exposiziun intima
L'exposiziun curada da Tobia Bezzola mussa maletgs, sculpturas e dissegns d'Alberto Giacometti da ses temp avant e suenter ch'el è stà a Paris ed ha lavurà là per 10 onns. En la chapitala franzosa aveva el creà oravant tut ovras surrealisticas. Cura ch'el era lura turnà enavos en il Grischun, haja el puspè dissegnà tenor models e la natira. E per si'entira vita haja el alura puspè empruvà da crear quai ch'el veseva, declera il curatur.
Ins enconuscha el forsa dals gronds museums en las grondas chapitalas internaziunalas. Ma el resta atgnamain in artist da la Bregaglia, da l'Engiadina. Qua ha el emprendì sia lingua artistica.
El ha purtretà savens ses confidents ils pli stretgs – ses geniturs, ses frar Diego u sia dunna Annette. L'exposiziun vegn enritgida da fotografias dad Ernst Scheidegger, in stretg ami e collavuratur da Giacometti che ha entupà l'artist l'emprima giada l'onn 1943 e documentà sia vita e sia ovra durant plirs decennis.
L'exposiziun a San Murezzan
-
Bild 1 von 6. L'exposiziun cun ovras d'Alberto Giacometti e fotografias dad Ernst Scheidegger en la gallaria Hauser & Wirth a San Murezzan. Bildquelle: SRF.
-
Bild 2 von 6. Sin ina da las fotografias dad Ernst Scheidegger ves'ins Alberto Giacometti durant sia lavur artistica. Bildquelle: MAD.
-
Bild 3 von 6. Sculpturas datti era da vesair en la gallaria a San Murezzan. Bildquelle: MAD.
-
Bild 4 von 6. Alberto Giacometti è vegnì fotografà durant ir a spass. Bildquelle: MAD.
-
Bild 5 von 6. La via maina tras il vitg da Stampa en Bregaglia. Bildquelle: MAD.
-
Bild 6 von 6. L'artist grischun purtretescha ina dunna. Bildquelle: MAD.
L'exposiziun «Faces and landscapes of home» en la gallaria Hauser & Wirth a San Murezzan ha anc lieu fin ils 28 da mars 2026.