Siglir tar il cuntegn

Header

audio
Higa: grond interess d'expositurs
Or da Actualitad dals 10.02.2024. Maletg: RTR
laschar ir. Durada: 3 minutas 22 Secundas.
cuntegn

Exposiziun da commerzi La «higa» turna

Ils dretgs per realisar la «higa» ha la Stadthalle Chur AG transferì a la United Events AG ch’è vegnida fundada da nov. La «higa» vegn ad avair lieu suenter Pasca, numnadamain dals 4 fin ils 7 d’avrigl 2024.

Adia «Grimavera», bainvegni «higa»

Sch'ins auda il num «higa» san ins precis tge ch'igl è. Da questa opiniun èn ils novs organisaturs da l'exposiziun da commerzi, industria e mastergn. Avant quatter onns ha la «higa» gì lieu la davosa giada. Suenter la pandemia ha l'exposiziun cun il num «Grimavera» remplazzà la «higa». Ils novs organisaturs èn da la opiniun da reviver la exposiziun puspè sut il num ch'ins enconuscha «higa», di FiFi Frei dal cussegl administrativ da la «higa».

Nus essan da l'opiniun che «higa» saja in num marcant e francà profundamain en la cultura dad exposiziuns da Cuira.
Autur: FiFi Frei Commember dal cussegl d'administraziun da la «higa»

I na dettia betg pli ina «higa» sco pli baud. Betg sco in'exposiziun classica da commerzi, mabain cun bleras attracziuns.

3 mais dirs

Ils dretgs per realisar la higa ha la Stadthalle Chur AG transferì a la United Events AG ch’è vegnida fundada da nov. Quai è capità pir avant curt temp ed uschia ha la United Events AG gì pauc temp.

Igl èn stads dirs trais mais. I n'è betg stà uschia che tuts han giubilà. Igl è stà in'acquista dira.
Autur: FiFi Frei Commember dal cussegl d'administraziun da la «higa»

Passa 1'000 telefons hajan els stuì far per acquistar ils expositurs, di FiFi Frei. Quai en in temp, nua che bleras interpresas hajan gia fatg lur preventiv per l'onn 2024. Tut ils expositurs giavischads n'han els betg survegnì.

Realisaziun annuala

La «higa» duai avair lieu mintg'onn. Il 2024 en la veglia halla da la citad, il 2025 è il lieu da realisaziun anc avert, forsa en edifizis da la pendiculara Brambrüesch e per il 2026 duai ella lura vegnir realisada al lieu final, en la nova halla da messa e d'events sin l'Obere Au a Cuira.

Marco Engel guarda enavos

Passa 20 onns è Marco Engel stà gestiunari da la «Expo Chur AG». Avant quatter onns ha el demissiunà. Il temp da la pandemia è stà fitg dir per la «higa», per el e per expositurs.

Igl è stà vairamain grev. Là avain nus sco er ils expositurs pers blers daners, perquai che tut era finì.
Autur: Marco Engel anteriur gestiunari da la Expo Chur AG

El era ed è anc adina persvadì che la «higa» haja in avegnir. Ins haja adina ditg ch'exposiziuns vegnian a murir ora. I sa mussia dentant adina puspè ch'exposiziuns na sajan anc adina betg mortas. I saja in instrument da marketing che funcziunia, di Marco Engel.

Dad ina vart ma manca il temp, cunzunt il contact cun la clientella ed ils collavuraturs. Da l’autra vart sun jau uss bler pli liber.
Autur: Marco Engel anteriur gestiunari da la Expo Chur AG

El chatta grondius ch’i vegn puspè a dar la «higa». Mo donn ch’igl haja cuzzà uschè ditg, di el. La pandemia saja a fin dapi dus onns. I saja uras che la «higa» returna, menziuna Marco Engel vinavant.

RTR actualitad 17:00

Artitgels legids il pli savens